MA’ PALIMBONG DEATA/ MA’ PALIMBONG TO MATUA ( KADA KADA TOMINAA)

1.       Apa malle – malle mani tang mallena, leaga mani tang leagana.

2.       Puang diosoki osokan pentiongan, kumua tumbari ia to dipogandang, tiapari ia to dipobombongan.

3.       Anna paliling bontongra ia tananan ongan lan rante manik na to merappu tallang. Anna dandan kalumbassikra ia pa’ toran kurin lan tadollo ata’na to memponan ao’.

4.       Anna diosokra ia alangan dirongko’, anna dibato’ ra ia karumpeng ao’.

5.       Anna disembangra ia bane’ sumombo lurekke, anna dipali’danra ia kabombongan rara’.

6.       Napoale mandi’ bai ma’ kuli’ pondan, napoampa’ lana-lana to bonde matua.

7.       Anna pabendanmo  ia dukkuan api, anna patunannangmo ia suean ma’ lana-lana.

8.       Randukmo ia napegarente tialling sangserekanna lako ba’bana lembang, napelale’ gumarente sangpa’ duananna lako pentutuan lipu.

9.       Apa Puang Matuari ia lan ba’tangna langi’ la kupobunga’ tongkon la kueranni kapuran pangngan, To Kaubananri ia dao masuanggana to palulungan la kupamatande unnisung la kupelalanni pelamba’ dibaulu.

10.   Bungka’ selengmokomi batu rupammi Puang Matua ulu lan to tana rangga, bidaran dotilangi’ mokomi karangan inaammi to Kaubanan lan to’ tandung tiulu.

11.   Ammi tontongipi inde to merrapu tallang la tumangke sanda mesuru’, nenne’ malaanganpi inde to memponan ao’ kumangkan lindo sara’ ka’.

12.   Kalemi Puang Matua ulu la metamba lako deata mamase, tondon to batangmi to Kaubanan la meongli’ lako Puang sa’ pala buda.

13.   Ammi tundan to mamma’ pa titanan tallu umballa’ langi’, miruyang to matindopa Puang unne’te’ to palullungan.

14.   Puang untampa to lino, Puang unggaraga to tongkon tau mata.

15.   Puang unggaraga sukaran aluk, unnindo’ pemali sanda saratu’, unnambe’ passalinan ganna’ dua riu.

16.    Malute ia undandan sangka, untanan ma’ lalan ada’. Umposarong basse kasalle, unnonganni panda dipamaro’ son.

17.   La situru’ pokomi deata mamase, la sipanglola pokomi Puang sa’ palabuda.

18.   Deata undandan bintoen tasak, umpataruk asi-asi malillin.

19.   Deata ma’ re’ pe bunga’ ma’ kapa londong, lumepong bulan tumare’ allo.

20.   Umpandan lemba’, umbato’ tallu situru’. Iamo tumampa gaun rumende salebu’, kumombong rambu roya.

21.   Iamo rumampa guntu’, kumombong lepa-lepa, tibiang kila’.

22.   Umpalosson uran dilangi’, umpake’de’ tana’ tak dibatara.

23.   Iamo Puang malute umpasitono’ papa tangngana langi’, mabangko umpa’ paranni masuanggana to pallullungan.

24.   Apa karua ade’ papa’ na langi’, sangpulo dua ade’ tono’- tonoranna masuanggana. Angku kendek langngan duanna, tallunna, a’pa’na, limanna, annanna, karuanna.

25.   O....iamo nanai Puang ma’ timpolok bulan, ma’ te’ paya bunga’, malute ma’ bobong laketau.

26.   Iamo Puang nenne’ ma’ pasangbali-bali rokko lisu pala’na to ma’ raputallang sola talu’ tuk tarunona to ma’ kaponan ao’.

27.   Kukendek langngan ma’ pengkaseranna, kulandi’ ma’ pesangpulona langi’, dao sangpulo misanna, dao sangpulo duanna.

28.   Belanna kulandi’ mo manetena langi’, kudete’ mo bubunganna batara.

29.   Tonangmo’ dao randan tarun-tarunanna disanga ma’ arru’ balusunna masua’ ganna.

30.   Inanna Puang sumpu mamase, sola Puang sa’ pala buda.

31.   Malutemo umpopa’ ponnoan sepu’ to torro tolino, umpalempan dikaropi’ to kenden tau mata.

32.   Ke’ de’ mokomi Puang mamase, tiangka’ mokomi sa’palabuda.

33.   Apa lumingka to belang komi manii, lume’dang to bantala-tala komi manii.

34.   Pamanda’ komi sape rundunmi’, pataruk komi lamba’ beluakmi.

35.   Kolong rombo komi eanan sanda makamban, sompo buntangan komi barang apa ponno ia’ na.

36.   Ammi bongsoran eran manikmi, ammi patuara’ kalisusun bulanmi.

37.   Apa iamo eran disiturananni, iamo bonglo’ disiosso’ i, ungkolong rumbo sanda makamban, ussompo buntangan angge manapa’.

38.   Disanga tua’ na tallu lolona, digente’ parayanna a’ pa’ tauninna.

39.   Polalan mokomi tibangkona rambu, polambanan mokomi tibantukna lelatu.

40.   Ammi mellesei litak diong ballaran ampa’, ammi mendemme’ daenan diong rantean tuyu.

41.   Sirau banne mokomi to torro to lino, siboto amboranmokomi to kenden tau mata.

42.   Anna tengka tedongpa randan dipudukku to dipogandang, anna te’ pa karambaupa tongka’ dililaku to dipobombongan.

43.   La tengka tedong rokko Puang sumpu mamase, la te’ pa karambau tama Puang sa’ palabuda.

44.   Apa tang kupomakassa’ manii ma’ bala kollong, tang kupomanimpa’ manii ma’kulambu penaa.

45.   La unnia’ didi tondok maelona to pasali sangka, la umpinde retokan pata’ kapayunganna to parande karua.

46.   Apa pia’pa aku dadingku, malolle’ pa aku garaganku na akumo dipatuo lamba’ lan te kapemalaran, akumo aku dipalole’ barana’ lan te kapangurrande-randean.

47.   La ussumbungan randan dipudukna to diponene’, ia unnumpu’ telo-telo tongka’ dililana to dipotomatua.

48.   Apa tuo balo’ ri tutungan bia’, tumbo kamuku’ ri tetangan massulo-sulo.

49.   Iamo la kupopentoean manda’ la pasumbungan puduk, iamo la kuponanti mototo’ la paumpuran kada-kada.

50.   Apa karua ade’ papa’ na to pasali sangka’, sangpulo dua ade’ kasitodoranna to parande karua.

51.   Apa pong tulak padang mo la kutunduan to mamma’ rokko mangapi’ na tana, pong tandi daenanmo la kuruyang to matindo rokko kalopakna pentutuan lipu.

52.   Malute ia umpolalan ma’ eran batunna rokko, mabangko ia ussassang ma’ karanganna diong ma’ papa morangna.

53.   Ianna deata mangallona rompon, Puang massalempa baraba, ma’ kundai lumu’, ma’ lullung bura-bura.

54.   Iamo deta dipolalan sape rundunna tumangke suru’, dipolambanan lamba’ beluakna kumangkan lindo sara’ ka’.

55.   Angkaran mokomi pa’ panompokmi, endekanmokomi pa’ patasikmi.

56.   Anna tua’na tallu lolona, anna parayanna a’ pa’ tauninna

57.   La mikolong rumbo te allo to temo, la mi sompo buntangan te kulla’ tomarassan.

58.   Ammi siturupa uaka’ kasallena kalimbuang boba, ammi sipanglolapa balimbing kalua’ na sakke malino.

59.   Ammi rubakpa tangngana padang ammi sussangparante kalua’

60.   Pobusarungngu’ pokomi tarampak banuanna to merrapu tallang, pebutantan bulemo laa’  pokomi tadollo ata’ na to ma’ kaponan ao’.

61.   Ammi rampo to lembang diong ballaran ampa’, ammi tu’tun koli-koli diong rantean tuyu.

62.   Apa lan untunduan to mamma’ pa’ ia deata ponnoi padang, la urruyangpa’ puang mala’bi daenan.

63.   Iamo deata paria tannun keallo-kebongi, iamo puang pasambe’ talikuran kemakale’ kekaroen.

64.   Deata rundun allo ma’ patudu-tudu, Puang sirondong paseko malillin nenne’ ma’ pakilala.

65.   Umpakilala to torro to lino, umpakainga’ to kenden tau mata.

66.   Tontong umpatudu lalanki’ undaka’ rokkoan kollong, umpate’ te mata kalambananki’ tumuntun tamman dibaroko.

67.   Iamo deata ditimba mata bubunna keallo-kebongi, disio’ tondon turunanna kekaroen kemakale’.

68.   Iamo deata dikalette’ utan malunanna, dire’ tok kayunna, dionno’ tanan-tanananna.

69.   Deata lumepong tondok sumembe’ mata kali.

70.   Deata umbala’ rante kalua’, unne’te’ tandung kalonaran.

71.   Deata umbori’ salu, umpatilengko randanan. Urrirak liku mandalan, umpakumallu darra’.

72.   Deata untombon ma’ karanganna, umpassarre tuka’ kuli’ na padang, unampa’ doti langi’ lipu sanda kalua’.

73.   Undandan buntu madao, unggaraga tanete malangka’, umpamakamban pangala’ tamman, umpadikki’ kakayuanna.

74.   Unggaraga ma’ buntu batunna, untampa tondok madaona.

75.   La kupaliling kanan poko te deata mamase, la kutamben bala tedong pokote puang sa’palabuda.

76.   La kulele buntu batummu, la kulinde kapayungammu.

77.   Tae’ komi la kutampe kuboko’ to deata mamase, tang den komi la kuanna lako-lakoan te puang sa’ pala buda.

78.   Ma’ urang sumomba’ mokomi lan kulla’ kamammuran, ma’kabumbu’ sidoloan mokomi te allo totemo.

79.   Pemanukkimokomi padang masero pindan, pa’ tidukunni mokomi lipu mabase banaa.

80.   Limbong mokomi diong pangrante manikna to merapu tallang, tasik mokomi diong pangrampa’ bulaanna to memponan ao’.

81.   Sipiak torro mokomi sang deatammi diong ballaran ampa’, sisese unnisung mokomi sangkapuanganmi diong rantean tuyu.

82.   Titanan tallu mokomi deata mamase kutete manikki kapuran pangngan, tisamba’ batu lalikanmokomi puang sa’pala buda kupelalan bulaanni pelamba’ dibaolu.

83.   Apa la kupasipiak torro pokomi nene’ manganna sangka’, lakupasisese unnisung pokomi to dolo lentenan panikuan.

84.   Pa iamo nene’ kiporara rarana torro to lino, ia mo to dolo kipobuku bukunna to kendean tau mata.

85.   Nene’ tepo a’pa’ ki, leso karuangki, daluk sangpulo annangki, bidang tallung pulo duangki.

86.   Nene’ dio tanda indo’, nene’ dio tanda ambe’.

87.   Ma’ urang sumomba’ mokomi to diponene’, ma’ bumbu’ sidoloan mokomi to dipotomatua.

88.   Pemanukki komi padang milepong pindan, pa’tidukunni komi lipu mirante banaa.

89.   Apa limbong mo taruk bulaanmi tumangke suru’, tasikmo lalosu kandauremi tumangke sara’ka’.

90.   Ma’ pangngan-pangan mokomi puang matua ulu, ma’ lea puduk mokomi puang mamase.

91.   Pada ma’ pangngan mokomi to diponene’, pada ma’ lea pudukmokomi to torro  to dipotomatua.

92.   Ammi mangka ma’ pangngan to, ammi kenden ma’ lea puduk, ammi tananni talinga tang bimbang, rumanduk pili’ tang pingu-pingu.

93.   Ammi tananni talinga te kapemalaran, ammi palidanni pa’ perangnginmi te pa’ urrande-randean.

94.   La umpalimbongkanni ma’ lolo tau, la umpatasikkanni semberan ma’ lotong ulu.

95.   La umpalimbong kanni takinan bunu’, la umpatasikkanni ponnoan alang.

96.   La umpalimbong kanni rendenan tedong, la umpatasik kanni umpuran komba kale’ ke’, sola eanan sanda makamban’ sola barang apa sanda umba’na.

97.   Apa iamo pemala’ natanan tallang to diponene’, ia mo pemala’ naranduk bulo ala’ to dipotomatua.

98.   Dianna batu silambi’dio mai pong mula tau, disedan karangan siratuan dio mai pong tumbo to lino.

99.   Tontong dialloni tang mapele mamma’, nenne’ dituladenni tang malilu tindo.

Tontong disiosso’ i , nene’ disiturananni sae lako allo totemo.